Rsi Melkisedek Agungan Bandingang Rsi Soroh Sentanan Lewi
7
Melkisedek puniki nenten tios Raja Salem lan rsi saking Sang Hyang Pengardi sane Maha Luhur. Rsi Melkisedek nyambut saha ngamertanin dane Abraham tatkala dane budal saking maperang ngalahang para rajane. 2 Kenten pada Rsi Melkisedek kicen aturan apahdasa (1/10) saking arta brana sane polihin dane Abraham ritatkala maperang.Pesengan Melkisedek puniki maarti “Raja sane Adil,” kenten pada “Raja Salem” sane maarti “Raja Dame.” 3 Nenten wenten katulis ring Cakepan Sucine indik ida madue aji lan ibu wiadin leluhur. Kenten pada nenten wenten katulis indik ida lekad utawi padem. Ida dados rsi salamin-laminne. Sekancan pracirine punika wantah ngambarang Putran Sang Hyang Pengardine.
4 Sane mangkin cingakin ja, amatke agungne Rsi Melkisedek. Dane Abraham leluhur iragane ngaturang apahdasa sane paling becik saking sekancan sane kapolihang ritatkala maperang. 5 Ring ukum agama Yahudine awig-awig sampun katetepang buat para rsi sane kaangkat saking soroh sentanan Lewi. Irika katulis para rsine punika musti ngambil apahdasa saking para krama Yahudine, inggih punika semetonnyane praragan, yadiastun ipun sami pada-pada soroh sentanan dane Abrahame. 6 Rsi Melkisedek nenten ja saking soroh sentanan Lewi, nanging ida pada nerima apahdasa saking arta sane kapolihin olih dane Abraham ritatkala maperang. Turmaning ida ngamertanin dane Abraham sane sampun nerima janji-janji saking Sang Hyang Pengardi. 7 Makasami anake uning linggih anake sane ngamertanin agengan bandingang anake sane kamertanin. 8 Para rsi saking soroh sentanan Lewi sane nerima apahdasa punika wantah anak sane sida padem. Nanging manut Cakepan Sucine, Rsi Melkisedek sane nerima apahdasa punika maurip salamin-laminne. 9 Iraga uning para Lewine sane nudukin apahdasa saking Bangsa Yahudine. Nanging sida kanikayang dane sampun ngicen apahdasa tatkala dane Abraham ngaturang aturane punika kapining Rsi Melkisedek idumun. 10 Yadiastun dane Lewi dereng lekad, dane sida kaucap sampun wenten ring ragan dane Abraham, leluhurnyane, ritatkala dane Abraham matemu sareng Rsi Melkisedek.
Sang Hyang Yesus Rsi sane Lebih Sempurna Bandingang Rsi Harun
11 Pinehang ja mangkin, anak Yahudine nerima ukum agamane madasar antuk ayahan para rsi soroh Lewine. Yadiastun kenten, dane sami nenten mresidayang ngamolihang kasempurnaan rohani saking ayah-ayahan danene. Punika mawinan, adiri rsi sane lianan kaperluang, inggih punika rsi sane sekadi Melkisedek, tur nenten ja saking soroh sentanan Lewi lan Harun. 12 Nah yening wenten soroh rsi lianan kaangkat, ukum agamane musti pada kaubah. 13 Sane katuek iriki, nenten tios Sang Ratu Agung iragane: Ida saking soroh sentanan anak Yehuda. Lan anak saking soroh Yehuda nenten taen ngayah dados rsi. 14 Anake sami sampun uning Sang Ratu Agung iragane punika saking soroh Yehuda; tur dane Musa nenten taen nikayang indik soroh Yehuda ritatkala dane nikayang indik para rsi.
15 Paindikan sane kabaosang puniki paindikan sane kalintang ngilis ritatkala katetepang adiri rsi lianan sane sekadi Rsi Melkisedek. 16 Sang Hyang Yesus kaangkat dados rsi, nenten ja kadasarin antuk awig-awig saking manusa, nanging kadasarin antuk urip Idane sane makuasa tur nenten prasida benyah. 17 Duaning wenten katulis ring Cakepan Sucine sapuniki,
“Cening ene Rsi kanti salamin-laminne
patuh buka Rsi Melkisedek ipidan.” Kidung 110:4
18 Nah sane mangkin awig-awig sane lawas nenten kaanggen malih krana nenten madue kakuatan lan nenten maguna. 19 Akidik ja ukum agama Yahudine punika nenten ngranayang manusane dados sempurna. Punika mawinan iraga mangkin kicen janji sane becikan, mangdane manusane prasida nampekin Sang Hyang Pengardi.
20 Samaliha makasamine punika kadasarin antuk sumpah saking Sang Hyang Pengardi. Nenten wenten sumpah sekadi punika ritatkala rsi lianan kaangkat. 21 Nanging Sang Ratu Agung kaangkat dados rsi nganggen sumpah olih Sang Hyang Pengardi. Irika Sang Hyang Pengardi ngandika kapining Ida sapuniki,
“Sang Hyang Tunggal sampun masumpah,
tur Ida nenten jagi ngubah pikayunan Idane,
‘Cening ene Rsi kanti salamin-laminne.’” Kidung 110:4
22 Malantaran paindikane puniki Sang Hyang Yesus sane dados jaminan prajanjiane sane becikan.
23 Wenten malih siki paindikan, inggih punika para rsine wenten akeh. Suang-suang rsine punika padem sane mawinan dane nenten sida nglanturang ayah-ayahannyane. 24 Nanging Sang Hyang Yesus maurip salamin-laminne. Punika mawinan Ida setata ngayah dados rsi. 25 Sane mangkin Sang Hyang Yesus mresidayang nylametang manusane salamin-laminne, inggih punika anake sane rauh ring Sang Hyang Pengardi malantaran Sang Hyang Yesus. Krana Ida setata maurip lan siaga mapinunas ring Sang Hyang Pengardi buat ipun sami.
26 Nah sane mangkin, Sang Hyang Yesus punika Rsi Penglingsir Agung sane perluang iraga. Ida suci tanpa cacad tur akidik ja nenten madue dosa. Sang Hyang Pengardi malasang Ida saking jadma sane madosa. Ida kaunggahang ka genahe sane paling tegeh, tegehan kapining saluirin langite. 27 Ida nenten ja pateh sekadi para Rsi Penglingsir Agung sane lianan. Sebilang dina dane ngaturang aturan buat dosan-dosan danene dumunan, wawu buat dosan-dosan para kramane. Nanging Sang Hyang Yesus ngaturang anggan Idane buat dosan-dosan kraman Idane kamanten. Sekadi punika Ida dados aturan apisan kamanten tur genep buat salamin-laminne. 28 Ukum agama Yahudine ngangkat anak sane nenten sempurna kadadosang Rsi Penglingsir Agung. Nanging salanturnyane, sasampune ukume punika, Sang Hyang Pengardi makarya janji nganggen sumpah indik Ida ngangkat Putran Idane kadadosang Rsi Penglingsir Agung. Sang Putra punika sane sampun dados sempurna buat salamin-laminne.